صناديق الاستثمار وشهادات الاستثمار
ايه الفرق بين شهادات الإستثمار و صناديق الإستثمار ؟
لو معايا مثلا ١٠٠ الف جنيه اعمل بيهم شهادة ولا اشتري وثائق صندوق إستثمار ؟
طيب متي يكون أحسن لي إني اشتري شهادة إستثمار و إيمته يكون أحسن لي الصندوق ؟
مبدأيا شهادات الإستثمار دي بتكون أوعية إدخارية ذات عائد ثابت أو متغير بتنشئها البنوك لجذب مدخرات الأفراد و بالتالي بتزيد من قدرة البنك علي خلق الائتمان و إقراض الغير و يقدر العميل يختار براحته نوعية العائد من البداية ففي شهادات بعائد ثابت و في بعائد متغير
إنما صناديق الاستثمار فدا بيكون اقرب ما يكون لشركات توظيف الأموال ( يعني هات فلوسك و احنا نشغلهالك و ع الحلوة و المرة متعاهدين) و لكن تحت رقابة صارمة من الهيئات الرقابية و أهمها الهيئة العامة للرقابة المالية و أيضاً البنك المركزي اللي بيراقب مؤسس الصندوق لو كان بنك و بالتالي فصندوق الإستثمار دا وعاء إستثماري بيكون هدفه مشاركة الأفراد و/أو الشركات في استثمارات بيضخها الصندوق في أصول اخري ذات طبيعة معينة و بتكون عوائدها بطبيعة الحال متغيرة ربما تكون أعلي من عوائد شهادات الاستثمار و ربما تكون أقل.
برضه فرق تاني بين شهادات الاستثمار و صناديق الاستثمار إن نوعية الربح بتختلف قليلا بين الاثنين ففي الشهادات بيكون العائد دوري فقط ( يعني تشتري الشهادة و يجيلك العائد بتاعها كل شهر أو ٣ شهور حسب الشهادة ) لكن أصل المبلغ بيظل ثابت أما صناديق الاستثمار فبتقدم ميزة تنوع العائد بحيث انك ممكن تلاقي صندوق بيوزع عائد دوري و كمان ممكن قيمة الوثيقة نفسها تزيد و بالتالي تقدر تحصل علي ربح رأسمالي أو بمعني آخر تراكمي
يعني إيه الكلام دا
تعالو نضرب مثال
واحد معاه ١٠٠ الف جنيه و راح اشتري شهادة ب٥٠ الف بعائد ١٥% لمدة سنه و العائد بيتوزع شهريا و بال ٥٠ الف التانية اشتري ١٠٠٠ و ثيقة ( بسعر ٥٠ جنيه للوثيقة ) من وثائق صندوق استثمار و ليكن صندوق أسهم أو مثلا صندوق متوازن
و جينا بعد سنه نشوف اخبار فلوسه ايه
هتلاقي صاحبنا دا بياخد عائد من الشهادة ٦٢٥ جنيه شهرياً و في اخر السنه هيستلم ال ٥٠ الف زي ما هي
و لما شوفنا اخبار فلوسه اللي في الصندوق لقينا أن الصندوق كان بيوزع عائد ربع سنوي ٢٠٠٠ جنيه ( يعني كأنه خد كل شهر ٦٦٦ جنيه ) و أصبح سعر الوثيقة ٦٠ جنيه
و بالتالي الصندوق حققله عائد دوري أعلي و كمان أصل المبلغ زاد من ٥٠ الف ل ٦٠ الف
و لكن زي ما صندوق الإستثمار بيقدم الميزة دي فأيضا وجه العملة الآخر بيحتوي علي مخاطرة بمعني أن ممكن الصندوق يخسر بدل ما يحقق ربح و قيمة الوثيقة ممكن تقل. أو ممكن يحصل علي عائد دوري عالي و لكن سعر الوثيقة يثبت أو العكس مبيكونش في عائد دوري و لكن سعر الوثيقة هو اللي يزيد……و هكذا
طيب انا كدا ايه اللي يخليني احط فلوسي في حاجة تحتمل المخاطرة بدل ما اشتري شهادة بعائد مضمون ؟
هنا بقي اقولك تعالي نعمل مقارنة بين مميزات و عيوب كل من الشهادات و صناديق الاستثمار بالنسبالنا احنا كأفراد
مميزات الشهادات
مضمونة العائد معدومة المخاطرة
معفاه من المصروفات الإدارية
يمكن الإقتراض بضمانها
عيوب الشهادات
أصل المبلغ بيتجمد طول فترة الشهادة فمتقدرش تستفيد بيه
غالبا متقدرش تكسرها غير بعد ٦ شهور
إذا كسرتها قبل انتهاء المدة بتخسر جزء من أصل المبلغ يعادل ما حصلت عليه من عوائد ( يعني كأنك مشترتش الشهادة أصلا )
مميزات الصناديق
التنويع في الإستثمارات و دا أحد الأسباب الرئيسية للارتفاع النسبي لأغلب الصناديق المتواجدة فعليا في عوائدها عن الشهادات علي المدي البعيد
وجود ميزة النمو الرأسمالي لأصل المبلغ المستثمر
تعتبر صناديق الإستثمار مدخل مناسب لدخول الاستثمار بالبورصة للأفراد اللي معندهمش الخبرة و الوقت للتداول بنفسهم
سهولة الشراء و الاسترداد لإنك تقدر تشتري في الوقت اللي انت عاوزه و كذلك تسترد وقت ما تحب حسب سعر الوثيقة سواء وقت الشراء أو وقت الاسترداد
أيضاً يمكن الإقتراض بضمان الوثائق
عيوب الصناديق
وجود نسبة تحمل مخاطر نتيجة طبيعة الأصول التي يستثمر فيها الصندوق و لكن بتختلف درجة المخاطر ( و بالتالي العائد المتوقع ) من صندوق لآخر حسب النسب الإستثمارية. فلو صندوق بيستثمر اغلب الأموال في الأسهم بتكون درجة المخاطر فيه أعلي من صندوق نقدي أو صندوق بيستثمر في أدوات الدين من سندات و أذون خزانة ( و كذلك بتكون عوائد صناديق الأسهم هي الاعلي في حالة الربح )
بعض الصناديق ممكن تفرض رسوم علي الشراء أو الاسترداد
وجود بعض الأعباء المالية علي الصندوق مثل أعباء ضريبية و أتعاب مدير الإستثمار / أتعاب شركة خدمات الإدارة / أتعاب مراقبي الحسابات / أتعاب لجنة الإشراف
و بالتالي انت لما تحتار بين انك تستثمر في شهادة الاستثمار ولا صناديق الإستثمار لازم تسأل نفسك كام سؤال زي
انت محتاج المبلغ بعد قد ايه ؟… هل ممكن تحتاجه قريب ولا دا مبلغ فائض و مش محتاجه ( لو هتحتاجه بعد فترة قصيرة فالصناديق احسن لكن لو مش محتاجه لفترة مدة الشهادة فالشهادات ممكن تكون أنسب في ضمان العائد)
العائد اللي بتستهدفه من الإستثمار و درجة تحملك للمخاطر ( لو مش عاوز مخاطر فالشهادات أحسن لكن لو بتدور علي عائد عالي علي المدي البعيد فالصناديق احسن)
و في الاخر تظل قاعدة التنويع هي الأساس لا تضع البيض كله في سلة واحدة
نوع استثمارك بين شهادات و صناديق و حتي استثمارات أخري
و حتي لما تشتري وثائق صناديق استثمار نوع ما بينها مرة اشتري في صندوق أسهم و مرة في صندوق متوازن و مرة في صندوق نقد و مرة في صندوق عقاري و هكذا .